Arhiva oznaka: Korina Juretić

‎Korina Juretić‎: Nesakidanji dan

punk prinčipesa i oportunista
z dušun napravnun samo za rock n roll
predomon
na kafu dopolne
dijagnoza svjetsko stanje
ekonomije
dolar je potloh
punk prinčipesa
vavik dela kako drugi judi ne
pa ča ako se ni oženila
ako j pol glave obrila
i za dicu nikad spravna
ona brije na viši cilj
buffet Ričinu
drži druga generacija
za šankon zovu treću turu pelinkovca
timidno se ćapuju za rabuši
i obrnju žepe
punkprinčipesa j uspomene
zahitala tamo nigder zada
va niki oltar da ih zmiša
sevajedno
još joj ki put odzvoni
nonića glas
ili od starega črnega
bicikla z velimi koli
zvono
žuta kapa z glave zasvitli ili to j sunce v oči
blišći pa joj suze oči od tega
ča navijamo za gosti ili za domaći
penzionerke
nimaju lazno
žure s kruhon
čeka ih
nova trajna
novi kapuz i fažol
i kobasice za zapozada

Korina Juretić: Moderni mi (Noć knjige 2017.)

sjajna osobo
ovo j leh za nas
super čarobna pjesma
ultra mirakul
za ostat v uhu
začrjenit srce
vas obraz
letnja arija
otprto kino
teplo puhja
život je cukar
črno-beli old movie se vrti
po dnu škartoca čipsa
je ostalo još soli paprike i kompira
a va najmanjen zrnu
frigane masti nigder
va krpah va horizontali
(kod pravi happy end na kraju)
utaknuli smo i zagubili se mi
sjajna osobo ovo j
leh za nas

Foto: iz filma Građanin Kane, Orson Welles, 1941.