Tonko Božanić Pepe: Śtõri ormarȗn

Gõre
u śufȉtu
u kantȗn
śtojȋ śtõri
ormarȗn
 
pȃucina nõ nje pãla
praśȉna śe nȋ śtīrãla
nȍge su na kolonȅte
varhu vrȏt je ornamȅnat
śa śufȉton nȋ kuntȅnat
 
vrȏtimo śe u ditȋnśtvo
kal me mãti deperãla
u kãmaru luśtrōvãla
a pomȕle i rucȉce
ko zãrcalo śe laśćȉli
 
iź mȅne je śve pahãlo
ś jubãvjun śe namīśćãlo
bĩli lancȗn i blaźȉnje
kuvertūrȅ i śćavȋne
dȗlnjo rȍba ol potrȉbe
 
prȉko śćōpȃ na pikȏnte
vȉśe gãće i jakȅte
dvȋ, trȋ vȅśte źa ol fȅśte
śudȏrići i kalcȅte
 
u śkafȅtu cȅko dȍta
nȍne i nȍnota
i joś nȉśto bjankarȉje
ca śe joś nȋ raspakãlo
źa fȅśtu se tȗ cuvãlo
 
naparȗc je i lumbrȅla
klobucȉć i bagulȋna
u śkarśelȋn śudarȋn
i źȇnsko burśȋna
 
bĩlo je tõte pȏlvera i pitȗre
i ofȋcij źa molȉt śkonźȗre
u śkãtulu ol plȉśa
dekumȇnte śe cuvãlo
i pȉneźe źaklopãlo
 
śvi u kȕću, śvi śu źnãli
dȉ su śtõri cȏ cūvãli
al ȕ tu śe nȋ śpancãlo
dok je śãrce batarjãlo
 
A śȃl gõre
u śufȉtu, u kantȗn
śtojȉ śtõri ormarȗn
cȏrv ga pomãlo jȋ
dokle dūśȃ mȋrno śpȋ.

Ilustracija: Alma Božanić Čače
Akcentuirala: Vanda Franičević

Odgovori